A delegada territorial da Xunta en Vigo, María José Bravo Bosch, visitou esta mañá as obras executadas no Concello de Mos para mellorar a eficiencia enerxética deste municipio, executadas a través dunha liña de axudas da Consellería de Economía e Industria.

Na visita, a delegada territorial estivo acompañada pola alcaldesa da localidade, Nidia Arévalo, así como polo xefe territorial de Economía e Industria, Ignacio Rial, e o concelleiro de Alumeado de Mos, Luis Alonso Seijo.

Bravo Bosch destacou os 31.000 euros de investimento que se destinaron a estas obras de mellora enerxética no concello de Mos e dos que máis de 22.000 euros corresponden á subvención aportada pola Consellería de Economía e Industria a través do Instituto Enerxético de Galicia (Inega).

Coma explicou a delegada, a través deste proxecto realizouse a substitución de 52 puntos de luz existentes por luminarias tipo LED de 41 W, incluíndo a desmontaxe das existentes así como a reforma do cadro de mando, protección e medida do alumeado público. “Esta medida levada a cabo suporá para o Concello de Mos un aforro enerxético de ata 5.000 euros anuais”, destacou a delegada, que comentou tamén que deste xeito conseguirase un aforro de 30.987 kWh ao ano.  “Con esta iniciativa se permitirá a redución das emisións de CO2 en 20,14 toneladas ao ano, o equivalente a 1.007 árbores plantados”, matizou finalmente Bravo Bosch.

A maiores de Mos, tamén se viron beneficiados por esta iniciativa os concellos de Ponteareas e Mondariz-Balneario posto que a subvención coa que se financiou esta obra foi acadada tras a sinatura dun convenio de colaboración entre municipios para a renovación das instalacións de iluminación pública existentes.

“A través desta actuación contribuímos ao aforro enerxético dos concellos nunha das súas partidas máis destacables, tendo en conta que a iluminación pública supón, de media, case o 70% do consumo eléctrico dun municipio”, explicou a responsable da Administración autonómica na área territorial de Vigo.

A Xunta de Galicia destinou este ano 4,5 millóns de euros a este programa de iluminación exterior do Inega, un 15% máis que na anterior convocatoria, “dos cales 1,3 corresponden á provincia de Pontevedra, onde se promoveron 6 proxectos de agrupacións municipais de ata 9 municipios”, explicou Bravo Bosch.

A Consellería de Economía e Industria promoveu unha vez máis os proxectos colaborativos como o da agrupación de Mos, que viu incrementada a contía da axuda ata o 85% fomentándose así a cooperación institucional e diminuíndo os custos de execución.

Deste xeito, a Xunta mostra unha especial sensibilidade cos municipios por ser a administración local a máis achegada aos cidadáns, tendo as medidas adoptadas un maior grao de visibilidade e repercusión pública. Con esta convocatoria, a pretensión é a renovación das instalacións de iluminación pública exterior existentes e baseadas en tecnoloxías obsoletas por outras máis actuais e máis eficientes, aplicando criterios de aforro e eficiencia enerxética que acaden unha cualificación enerxética A ou B.