O Colectivo de Xubilados e Pensionistas da CIG convoca para mañá xoves concentracións en diferentes cidades de Galiza para denunciar o cativo incremento das pensións, dun 0,25% -apenas 1,82 euros-. Denuncia que, deste xeito, se empobrece ás xubiladas/os e pensionistas, tendo en conta que as contías das mesmas son das máis baixas do Estado español.

O Colectivo de Xubilados e Pensionistas da CIG lembra que os/as 743.793 perceptores/as galegos/as que cobran de media 730,77 euros en cada pagamento mensual percibirán exactamente 1,82 € máis que no ano 2014 o que supón unha perda de poder adquisitivo que se suma ás políticas de recortes de prestacións sociais públicas á terceira idade como son a atención á saúde e á dependencia e ao repago de medicamentos.

 A isto engaden que “isto afectará, non só ao colectivo de pensionistas senón tamén, en moitos casos, ás súas familias, que por non teren ingresos de seu, precisan das súas achegas económicas para poderen formarse ou mesmo subsistir”.

No decurso das concentracións farán tamén entrega dun escrito colectivo de denuncia no que dan conta destas cuestións, dirixida tanto á Ministra de Emprego e Seguridade Social como ao Ministro de Facenda e Administracións Públicas.

Horas e lugares

En Pontevedra será ás 12:00 horas diante da Subdelegación do Gobern, mentres que en Vigo o farán diante  do INSS ( Rua O Grove, Coia) á mesma hora.