Unha pota esquecida no lume parece ser a causa dun pequeno incendio producido no interior dunha vivenda situada na Avenida de Bueu, en Cangas. O dono do inmoble, que quedou durmido tras poñer a ola ao lume, tivo que ser trasladado polos servizos sanitarios de urxencia ao Centro de Saúde da localidade con síntomas de intoxicación por inhalación de fume, aínda que o seu estado non revestía gravidade. Os axentes da Policía Local indicaron que o fume era visible dende o patio interior da vivenda, situada no primeiro andar do número 15 da Avenida de Bueu. O temor de que houbese alguén dentro da casa motivou a mobilización de Urxencias Médicas, así como dos Bombeiros do Morrazo, que tiveron que acceder pola fiestra coa axuda da auto escaleira. Foron os axentes da Policía Local de Cangas quen alertou ao persoal do CAE 112 Galicia ao fío desta medianoite. De seguido, dende o Centro de Atención ás Emerxencias de Galicia se solicitou a colaboración dos efectivos do servizo de extinción e rescate da comarca e do persoal sanitario de urxencia.