Un total de tres persoas resultaron feridas a causa dunha colisión múltiple na que se viu implicado un coche patrulla da Garda Civil de Tráfico. Outros dous turismos e un camión cisterna destinado ao transporte de gasolina, que ía baleiro, estiveron involucrados no accidente, que tivo lugar na entrada á AP-9 dende a Rúa Bos Aires, en Vigo.

Os servizos sanitarios de urxencia trasladaron a un dos feridos ao Hospital Povisa, mentres que os outros dous aínda estaban a ser atendidos no lugar do sinistro. Pola súa banda, os Bombeiros de Vigo, que se desprazaron á AP-9 alertados polo persoal do 112 Galicia, descartaron que houbese persoas atrapadas. Ademais dos efectivos do parque municipal, o CAE 112 solicitou a intervención de Urxencias Médicas e Protección Civil de Vigo. Varios condutores que circulaban pola AP-9 nese momento pediron axuda ao Centro de Atención ás Emerxencias de Galicia cando pasaban apenas catro minutos das 11:00 horas de hoxe.