O corpo sen vida dun home foi atopado esta tarde flotando preto do porto deportivo de Arcade, no concello pontevedrés de Soutomaior. Un particular alertou ao CAE 112 Galicia ao redor das 13:45 horas desta tarde do suceso e dunha embarcación de recreo que tamén se atopaba á deriva. De seguido, pasouse aviso a Salvamento Marítimo de Vigo, que mobilizou o helicóptero Pesca I e atopou ao home, que foi levado ao peirao de Arcade por un dos remolcadores.

 

Descoñécense as causas do ocorrido, aínda que Salvamento apunta a unha posible caída accidental. Así mesmo, informaron que a embarcación fora amarrada no porto por uns particulares. Dende o 112 Galicia solicitouse, tamén, a intervención da Garda Civil, dos efectivos de Protección Civil de Soutomaior de Redondela, ademais de informar ao Servizo de Gardacostas de Galicia e a Salvamento Marítimo de Fisterra.