A concellería de Educación e Participación Cidadá que dirixe a edil mosense Kely Monzón organiza unha viaxe para a terceira idade baixo o título de ‘Excursión Tres Nacións’ que se levará a cabo do 13 ó 17 de abril.

Con esta actividade preténdese ofertar ós maiores do Concello de Mos a posibilidade de coñecer tres nacións nunha mesma viaxe: Jaca en Aragón, Lourdes (Francia) e Andorra.

Poderán beneficiarse desta saída todas as persoas empadroadas no Concello de Mos maiores de 65 anos, ou pensionistas maiores de 55 anos. Non é preciso que os cónxuxes ou parellas de feito que estean inscritos no rexistro, cumpran os requisitos. No caso de existir vacantes poderán participar os maiores de 55 anos que non desenvolvan actividade laboral e as persoas non empadroadas en  Mos. Os fillos/as discapacitados/as poden acompañar ós seus pais.

Para participar nesta actividade as persoas interesadas deberán apuntarse no Rexistro do Concello, facéndoo de maneira presencial para asinar a solicitude, sendo imprescindible o cumprimento dos requisitos.

O prazo de inscrición xa está aberto e rematará o vindeiro 6 de abril. Para inscribirse será imprescindible presentar unha copia da solicitude asinada e unha copia do DNI. O listado de asistentes constituirase por rigorosa orde de entrada da solicitude no Rexistro do Concello. O día 7 de abril farase pública a lista de admitidos/as.