Un home resultou ferido ao saírse da vía o vehículo que conducía e precipitarse por un terraplén en Baiona, na estrada que une Sabarís e Belesar, no lugar de A Estibada.

Un particular alertou ao 112 Galicia ás 16:40 horas desta tarde e, de seguido, pasouse aviso aos Bombeiros de Baixo Miño, que axudaron ao varón a saír do vehículo por unha das portas, mais non foron necesarios medios de excarceración. Os efectivos de Protección Civil de Nigrán, os axentes da Garda Civil de Tráfico e os GES do Val Miñor foron avisados tamén polo CAE 112 Galicia, ademais de Urxencias Médicas, que atendeu ao ferido no punto do accidente.