O calcio é un dos minerais máis importantes para a saúde do ser humano. Da súa axeitada absorción e fixación depende a densidade ósea, principal indicador da fortaleza do esqueleto fronte a patoloxías como a osteoporose, de gran prevalencia entre a poboación feminina. Non obstante, 8 de cada 10 mulleres en idade adulta non toman as cantidades de calcio necesarias para asegurar a boa saúde dos seus ósos.

Esta foi unha das cuestións que, debido á súa estreita relación coa saúde feminina, foi tratado na 3ª Reunión Científica GINEP, celebrada recentemente e que contou coa presenza dalgúns dos especialistas con máis traxectoria no ámbito da xinecoloxía privada. Deste modo, os expertos incidiron na importancia dunha axeitada inxestión de calcio, xa que conxuntamente coa práctica habitual de exercicio e unha alimentación equilibrada, son o principal instrumento para lograr unha axeitada densidade ósea e para a prevención de patoloxías como a osteoporose.

Ata un 69% de mulleres presentan déficit na toma de vitamina D, cuxa
inxestión diaria se sitúa un 50% por debaixo
do recomendado

Tal e como subliñou o Dr. Santiago Pazos, Director do Centro Médico Instituto Pazos de Saúde e Medicina da Muller e Presidente Honorífico da Asociación Española para o Estudo da Menopausa (AEEM), “é fundamental que a poboación española, e en especial a feminina, tome conciencia da importancia fundamental de garantir uns correctos niveis de calcio no organismo. Se ben nin nenos nin adultos consume as cantidades de calcio recomendadas pola OMS, esta inxestión é especialmente deficitaria no caso mulleres españolas durante a menopausa, xa que case o 80% delas non o consume nas cantidades axeitadas”.

VITAMINA D E K, FUNDAMENTAIS
Precisamente, no marco desta Reunión Científica, os expertos presentes tiveron ocasión de coñecer algúns dos datos preliminares do Estudo Eficalcio sobre os efectos da inxestión diaria dun preparado lácteo enriquecido con doses altas de vitamina D en mulleres postmenopáusicas sas. Este estudo, aínda en curso, comeza a botar algunhas rechamantes conclusións, entre as que destaca a melloría significativa do estado de Vitamina D en mulleres de máis de 58 anos de idade que diariamente inxiren un produto lácteo enriquecido con doses altas de vitamina D.

A vitamina D xoga un papel principal na absorción do calcio, xa que a súa presenza é indispensable para que o intestino poida absorber o calcio necesario para a óptima mineralización dos ósos. Actualmente en España hai unha elevada prevalencia de déficit de vitamina D. Ata un 69% de mulleres presentan déficit na toma desta vitamina, cuxa inxestión diaria se sitúa un 50% por debaixo do recomendado.

Ademais de garantir unha axeitada inxestión de Vitamina D e calcio para coidar os ósos, este consumo tamén debe ir acompañado de Vitamina K, nutriente que entre os seus principais beneficios para a saúde do ser humano está favorecer a correcta fixación do calcio nos ósos. Lamentablemente, os españois tampouco toman as cantidades de vitamina K que recomendan os expertos. Un estudo científico levado a cabo en 2013 por nutricionistas de varias universidades madrileñas3 mostra que case o 50% dos españois non consume a suficiente cantidade de froitas e verduras, principal fonte desta vitamina.

60% DO CALCIO QUE SE CONSUME ELIMÍNASE DE FORMA NATURAL
Neste sentido, os expertos subliñan que non todo o calcio que conteñen os alimentos é asimilado polo corpo da mesma forma. Tal e como sinalou a doutora Nancy Salas, directora do Departamento de Investigación Clínica do Instituto Pazos, “a gran maioría dos minerais mostran certas interaccións con outros nutrientes, que poden favorecer a súa absorción ou pola contra, provocar que sexan eliminados. De feito, diversos estudos demostran que o 60% do calcio que se consume se elimina de forma natural”.

Os datos preliminares presentados do Estudo Eficalcio2, en curso, mostran a melloría significativa do estado de Vitamina D en mulleres de máis de 58 anos de idade que diariamente inxiren un produto lácteo enriquecido con doses altas deste nutriente

Así mesmo, indicou que “mentres que o noso organismo absorbe o 32% do calcio que contén o leite, nas améndoas é o 21%, nos legumes é o 17% e as espinacas un 5%. Desta forma, gran parte do calcio que tomamos cada día é eliminado sen que se chegue a incorporar á masa ósea. Para facilitar que chegue e que quede fixado ao óso, a inxestión axeitada deste mineral debe ser complementada con outros nutrientes como a vitamina D e K logrando o seu desenvolvemento e protección”.