Os efectivos do parque comarcal de Ponteareas excarceraron a unha persoa que quedara atrapada no seu vehículo ao sufrir unha colisión con outro coche en Salvaterra de Miño, na estrada que une o concello pontevedrés con Ponteareas, concretamente, na recta de Fornelos. Urxencias Médicas deu a alerta ao CAE 112 Galicia ao fío das 8:00 horas desta mañá e indicou que a persoa estaba inconsciente e que había dificultades para liberala. O persoal do 112 Galicia solicitou a intervención dos axentes da Garda Civil de Tráfico e do servizo de limpeza e mantemento da estrada, ademais dos Bombeiros de Ponteareas e Baixo Miño.