Nas manifestacións denunciaranse as altas taxas de desemprego que se rexistran;  que o emprego que se crea é de baixa calidade; os salarios están a perder poder adquisitivo; crecen a pobreza e a desigualdade; e vulnéranse as liberdades e o dereito de folga.

Neste contexto, CCOO e UGT insisten en que as persoas son o primeiro, en que hai que rematar coas políticas de recortes, avogan polo cambio de políticas para saír da crise do xeito máis xusto e sostible e esixen actuacións urxentes para reforzar a negociación colectiva, crear emprego de calidade, mellorar os salarios, estender a protección social e recuperar e fortalecer a democracia.

Este Primeiro de Maio celebrarase coa certeza de que as políticas aplicadas desde 2010 alimentaron en Galicia, en España e en toda Europa unha recesión de devastadores efectos sobre o emprego, a cohesión social e a calidade de vida da cidadanía.

Mañá as manifestacións terán unha peculiaridade con respecto a edicións precedentes, sairán inicialmente sen pancarta, cos manifestantes enganchados dos brazos e unha “mordaza” na boca. Só se despregarán as pancartas cando leven uns metros percorridos. Isto farase como símbolo de solidariedade cos compañeiros de Teruel, a única provincia onde se prohibiu o lema da manifestación por interferir, “supostamente”, na campaña electoral, aínda que o Tribunal Superior de Xustiza de Aragón xa lle deu a razón aos sindicatos.