O Partido Popular de Salceda de Caselas asegura que entende o seu programa electoral como un “contrato real” cos veciños e como tal, “somos coherentes nas nosas accións e manifestación e por iso nunca exporemos propostas imposibles ou promesas fantasiosas”, subliña o presidente do PP e candidato á Alcaldía Santiago Rodríguez Davila. Precisamente, “exemplo da nosa honestidade é a diferenciación entre as promesas e as propostas”. As primeiras son un compromiso firme de que serán executadas nos próximos catro anos se obtemos a maioría necesaria para gobernar; son promesas realistas e realizables. As segundas, igual de precisas, teñen unha maior complexidade á hora de seren postas en marcha, “sobre todo debido á crise pola que atravesamos froito en parte do despilfarro e da mala xestión do bipartito local, o que non significa que non deixemos de loitar para que as propostas sexan tamén unha realidade. Neste contexto os populares salcedenses están a presentar en todas as parroquias esas promesas e propostas nas diferentes áreas”.

Medio ambiente e medio rural

O saneamento será “a prioridade en materia de medio ambiente e medio rural do PP ao fronte do Concello, conseguir que o maior número de vivendas estean conectadas á EDAR de Guillarei para o cal se concluirán todos os traballos que están por rematar realizando tamén novas obras para tal fin”. Do mesmo xeito, outra das promesas é “a construción dun punto limpo ou establecer algún tipo de convenio con concellos limítrofes para dispor deste servizo, ao igual que tamén manterá diálogo e colaboración con municipios veciños para a unión das distintas sendas peonís na ribeira do río Caselas”. O Partido Popular restaurará tamén as pozas fontes e lavadoiros.

As propostas neste apartado céntranse en impulsar unha iniciativa supramunicipal para xestionar o baleirado das fosas sépticas de maneira regulada coa finalidade de evitar vertidos incontrolados e sancións e seguir mellorando e construíndo sendas e equipamentos de esparcemento públicos nunha contorna rural.

Infraestruturas e servizos

En materia de infraestruturas, o Partido Popular de Salceda de Caselas porá en marcha un plan anual de mantemento e limpeza de estradas e cunetas e de limpeza de rúas e beirarrúas para o cal adquirirá a maquinaria e os vehículos adecuados; impulsará o PXOM; creará un rexistro municipal de empresas de Salceda co obxectivo de que todas teñan a oportunidade de traballar para o Concello e mellorará o acceso dende o Alto da Forca coa estrada PO-510.

En canto a outras propostas polas que “se traballará para a súa execución son a construción dunha rotonda no parque da Gándara e remodelación da estrada provincial dende este cruce ata Pedracarballa (San Blas-Entenza) con beirarrúas e outra glorieta na Lagüela ou mellora do acceso cara a Salvaterra de Miño”. Tamén, sinalan,  “se tentará acondicionar o acceso á PO-510  na antiga fábrica de Pedra Altamira e o ensanche e mellora do viario dende aí ata a estrada provincial a Esfarrapada-Igrexa-Picoña, á altura do edifico da Asociación de Veciños Caselas”.