O director do momento, tamén actor e guionista, Daniel Guzmán, estará no XII Festival de Cans. Virá presentar A cambio de nada, a súa ópera prima, coa que acaba de arrasar no Festival de Cine de Málaga (onde recibiu a Biznaga de Ouro á Mellor Película e premios á mellor dirección e actor e Premio da Crítica). A proxección do filme, introducida polo propio director, será o xoves 21 ás 20h00 no Círculo Recreativo e Cultural do Porriño. Daniel Guzmán e Javier Gutierrez, Premio Pedigree desta edición, protagonizarán tamén o encontro aberto de CREA, a Asociación de Directores e Realizadores de Galicia, unha cita que pretende achegar ao público unha visión ampliada do mundo da realización e a creación e que terá lugar o venres 22 ás 10h00 no Baixo de Moncho. Dúas ocasións para conversar sobre cinema cun dos nomes máis relevantes do momento no sector audiovisual do Estado.