A ANPA Tea oponse a que "unha redacción ambigua na LOMCE na que só fala de medidas ordinarias ou extraordinarias máis axeitadas" poida supoñer a repetición de curso ou unha nota no expediente do alumnado que condicione o seu futuro dentro do sistema educativo.

A ANPA Tea solicitou información por escrito no Consello Escolar do centro sobre que medidas se adoptarán e  sobre como se reflectirá o resultado desta proba no expediente académico do alumnado se este resulta desfavorable. Sinalan que "obtivemos como resposta as instrucións para o desenvolvemento da avaliación individualizada que describe o DOG".

Estas probas levaranse a cabo no CEIP Fermín Bouza Brey os días 27 e 28 de maio. Dende a ANPA Tea enviouse xa ás familias “toda a información recadada aínda que insuficiente, lembrándolles o seu dereito a coñecer de que xeito poden participar na educación dos seus fillos e fillas e tamén como manifestar o seu desacordo, se é o caso, coa realización de ditas probas ou coa falta de información existente”.

Dende a  ANPA Tea amosan o seu apoio “ás familias que non queren someter aos seus fillos e fillas a un proceso avaliador que non ten ningunha finalidade educativa de mellorar a aprendizaxe, senón que só ten unha vontade de segregación”.