Un home foi rescatado esta tarde tras caer nunhas rochas na praia de Mingotes, no concello pontevedrés de Marín. Os Bombeiros do Morrazo e os efectivos de Protección Civil de Marín encargáronse da evacuación por terra do ferido que, posteriormente, foi evacuado en ambulancia ao Hospital Montecelo. Segundo informaron os axentes da Policía Nacional, o varón lesionouse un nocello por mor da caída. Tras recibir a alerta dun particular ao fío das 17:30 horas de hoxe, o 112 Galicia informou a Salvamento Marítimo e ao Servizo de Gardacostas de Galicia, que mobilizaron unha embarcación e o helicóptero Pesca I ante a posibilidade de que a evacuación só se puidese facer por mar. Finalmente, estes medios non chegaron a intervir no rescate, ao realizarse por terra. Ademais, o CAE 112 Galicia requiriu a presenza de Urxencias Médicas e das forzas da orde. Por outra banda, en Ribadeo, o persoal de Protección Civil rescatou a un home que quedara atrapado no lodo, no porto de Figueirua. Minutos antes das 16:00 horas desta tarde, un particular alertou ao 112 Galicia, que informou, ademais, á Policía Local.