Un peregrino de nacionalidade alemá foi rescatado esta tarde polo helicóptero Pesca I tras precipitarse ca súa bicicleta por un terraplén na Guarda, na zona de Area Grande. Posteriormente, foi trasladado ao Aeroporto de Vigo, onde unha ambulancia con persoal médico agardaba para asistir ao ferido, que presentaba dores. Foi o propio implicado o que alertou ao CAE 112 Galicia ao fío das 14:45 horas da tarde de hoxe e indicou que caera nunha zona próxima ao mar, nas rochas, de onde non podía saír polos seus propios medios. O operativo de busca e rescate durou unhas dúas horas, xa que o peregrino non podía especificar a súa localización, un lugar de difícil acceso, ademais. En dito operativo participaron os efectivos do GES de A Guarda, os Bombeiros do Baixo Miño e os axentes da Garda Civil, ademais do Servizo Gardacostas de Galicia. Tamén foron informados polo persoal do 112 Galicia, Urxencias Médicas e Salvamento Marítimo.