Os bombeiros de Baixo Miño extinguiron esta mañá un lume que se iniciou nun silo de serraduras dunha fábrica de madeiras situada no Polígono do Cerquido, en Salceda de Caselas. O lume quedou totalmente sufocado, segundo informaron os efectivos de extinción ao CAE 112 Galicia. O Persoal do 112 Galicia tivo constancia do suceso pasados uns minutos das 09:30 horas de hoxe grazas á chamada de varios particulares e do persoal da empresa afectada. Dende entón e ata case as 12:00 horas do mediodía, os bombeiros estiveron no lugar coas tarefas de extinción e de refrixeración. Por fortuna, ninguén resultou ferido. Dende o 112 Galicia ademais de alertar aos bombeiros, tamén se informou aos axentes da Garda Civil, ao persoal do Concello, e, ao servizo de Medio Ambiente da Xunta de Galicia.