Con 3.788 votos e oito concelleiros electos o Partido Popular do Porriño consolídase como a formación política máis votada, pero Nelson Santos queda ás portas da maioría absoluta, ao non conseguir os nove edís necesarios.

O PSdeG-PSOE consegue catro concelleiros dos 2.036 votos que tivo, desta forma o partido de Eva García de la Torre posiciónase como a segunda forza política da localidade.

Pola súa banda a formación de Manuel Carrera (UDDL) alcanza dous concelleiros coa suma de 1229 votos, o que a sitúa como terceira forza política. En cuarta posición, por número de votos, está o BNG con dous concelleiros e 1.161 votos. EU-SON terá representación na corporación municipal ao conseguir un concelleiro con 671 votos.

Pola súa banda as candidaturas AEP e CxG-CCTT non obtiveron representación municipal.

A localidade elixía a que será a nova corporación municipal durante os próximos 4 anos e que contará cun total de 17 concelleiros.

Esta xornada electoral, na que acudía a votar 10.617 veciñas e veciños, transcorreu con normalidade e sen incidentes relevantes. Houbo 350 votos nulos e 207 en branco.

A ausencia de maiorías absolutas obrigará a estas cinco formacións a negociar acordos que garantan a gobernabilidade do municipio. Polo momento Carreira xa anunciou que non pactará "nunca" con Santos.

Ante un escenario político que se presenta moi aberto a futuros pactos, García de la Torre podería ser a primeira alcaldesa da democracia no Porriño, aínda que para iso deberá de sumar os apoios das outras tres forzas minoritarias entre as que se encontran dous grupos da esquerda e un de centro dereita.