Sra. Alcaldesa, é obrigado comezar esta entrevista pedíndolle un balance sobre os recentes comicios municipais nos que vostede resultou reelexida.

É evidente que a nivel xeral produciuse un cambio xeralizado de tendencia política, por iso considero os resultados en Mos dobremente positivos. Revalidamos a Alcaldía grazas a catro anos previos de intenso traballo que terán agora continuidade durante catro anos máis. Considero que os veciños e veciñas mosenses son moi intelixentes e souberon elixir a mellor, a única diría eu, opción de futuro para o seu Concello.

Coincidencias do destino, este ano o Día da Rosa, 13 de xuño, celébrase o Pleno de Constitución da nova Corporación Municipal mosense, trasladándose os actos oficiais da Festa da Rosa ao 14 de xuño. Coinciden pois dúas datas de gran relevancia e emotividade, vivirá vostede este feito dun xeito especial?

Por suposto, xa que considero que son dous dos momentos moi importantes e a súa coincidencia no tempo fai, se cabe, estes actos máis emotivos.

Que ten de particular cada un destes actos?

Por unha banda na sesión plenaria de toma de posesión materialízase o apoio da veciñanza e a súa decisión de elixirte como a súa representante, polo que se trata dun intre enormemente emocionante e solemne, tanto para o rexedor local coma para o resto de corporativos municipais.

E por outro lado a da Rosa é a festa grande de Mos por antonomasia, unha celebración emblemática que nos define e representa como pobo. Por iso me sinto contenta, orgullosa e emocionada de que ambos os dous actos coincidan.

Comeza pois unha nova lexislatura e é momento de facer balance da anterior, cales considera os principais logros do seu equipo de goberno durante os últimos catro anos?

En primeiro lugar reconducir a economía municipal conseguindo que o de Mos volva ser un Concello con superávit, ademais agora podemos ter o orgullo de que as empresas volvan querer traballar connosco.

Tamén logramos reducir sensiblemente a taxa de desemprego de Mos a través de políticas proactivas de formación e emprego mediante as que prestamos atención e asesoramento a unhas 13.000 persoas e investimos preto de 5 millóns de euros.

En materia de infraestruturas a pasada lexislatura tamén foi de importancia vital para o Concello de Mos.

Si, rematamos o Plan Xeral de Ordenación Municipal que pronto será aprobado definitivamente e logramos a revogación por parte do Ministerio de Fomento do trazado da nova autovía Vigo-Porriño que tanto prexudicaría á nosa localidade. 

En materia de saneamento e abastecemento investíronse 5 millóns de euros para lograr duplicar a rede de saneamento municipal e dar servizo a máis de 1.800 vivendas e industrias. E no apartado de vías e obras, optimizáronse máis de 120 vías con reposición da capa de rodadura e mellora da seguridade viaria.

Ademais o equipo de goberno local rematou a lexislatura con boas noticias en materia de Benestar Social e Transporte.

Conseguimos unha terceira Escola Infantil para Mos que se situará na Veigadaña, a escrituración e inscrición a nome dos veciños dos terreos de San Rafael en Pereiras, e a posta en marcha do Plan de Transporte Metropolitano a pesar do Concello de Vigo.

Unha conclusión para este amplo balance dos últimos catro anos?

En resumo, e para concluír, xestionamos un total de 10 millóns de euros que foron investidos en Mos por outras administracións. Creo que esta cifra fala por si soa.

E cal é a súa folla de ruta para os vindeiros catros anos da nova lexislatura?

Pois consistirá nunha xestión pensada por e para as persoas, baseada en catro liñas fundamentais: Benestar Social, Emprego, Transporte e espazos verdes, de ocio e de cultura. Desenvolveremos o PXOM xa rematado e un Plan de Transporte Municipal sustentado no Transporte Metropolitano. Todo isto do xeito máis eficaz e coa maior eficiencia de recursos. Faremos un traballo realista e moi próximo ás necesidades diarias dos veciños e veciñas mosenses.

Volvendo á Festa da Rosa 2015, parece que se afianza de novo a exaltación da empanada de pan de millo retomada o ano pasado.

Si, este ano realizaremos tamén, ao igual que se fixo o ano pasado, a exaltación da empanada de pan de millo o propio día de celebración dos actos oficiais da Rosa, que na presente edición será o domingo 14 de xuño. Grazas á colaboración da Asociación de Mulleres Rurais Val da Louriña, retomamos a tradicional Festa da Empanada de Mos, que fora interrompida durante algúns anos.

Neste sentido, gustaríame animar a todos os amantes da cociña en xeral e da empanada en particular, a participar no concurso de empanadas de pan de millo, que terá lugar o día 14, presentando as súas creacións culinarias a partir das 09.00 horas da mañá.

Mantense tamén o concurso de ramos de rosas?

Por suposto, a rosa é o noso emblema. O símbolo central do noso escudo e signo de identidade do Concello de Mos e dos seus habitantes, por iso a Festa da Rosa non podería existir sen o concurso de ramos de rosas.

Cre que será elevada a participación neste concurso?

Gustaríame animar a todos os e as mosenses a que continúen a participar neste concurso tan representativo e emblemático do noso Concello que é, sen dúbida ningunha, a xoia da programación da Festa da Rosa.

Oxalá que este ano sexa todo un éxito de participación para que a rosa de Mos sexa a verdadeira protagonista da festa que leva o seu nome.

Xa para rematar cóntenos, como espera vivir a título persoal a Festa da Rosa 2015?

Pois ademais de rodeada dos meus queridos conveciños, na compaña dos meus familiares e amigos. Coa mesma emoción e nerviosismo de sempre pola responsabilidade que implica e pola incerteza de se o traballo que fixemos con tanto cariño será do agrado de todos os mosenses.

A da Rosa é sen dúbida a festa máis importante do Concello de Mos e é para min un orgullo poder vivila como alcaldesa do municipio por sétimo ano consecutivo.