Os traballadores da empresa concesionaria de residuos urbanos no Concello de Ponteareas, FCC S.A., veñen de desconvocar a folga iniciada o pasado día luns, 1 de xuño, despois de que a propia empresa e varios representantes dos traballadores chegaran a un acordo nun encontro mantido a pasada madrugada.

Este acordo implica unha lixeira suba salarial para os traballadores nos meses que restan deste ano 2015. Esta suba será completamente asumida pola empresa, tal e como viña reclamando o goberno local e tal e como está establecido no contrato de prestación de servizo público en “xestión indirecta”, no que se especifica que é a empresa concesionaria a encargada de realizar con total independencia a xestión do persoal e, polo tanto, a encargada de resolver as diferenzas salariais que poidan existir cos traballadores.