Un total de cinco persoas foron trasladadas polos servizos sanitarios de urxencia por mor dunha colisión entre dous turismos. Os feridos viaxaban nun dos vehículos sinistrados, mentres que o condutor do outro vehículo resultou ileso. O accidente tivo lugar na rúa Gondomar, no núcleo urbano de Tomiño. Tras rexistrar a chamada dun particular, minutos antes das 20:30 horas da tarde de onte, o 112 Galicia informou a Urxencias Médicas, Policía Local, Garda Civil de Tráfico, GES de A Guarda e Protección Civil de Tomiño. Por outra banda, no concello lucense de Guntín outras tres persoas resultaron feridas de diversa consideración por mor dunha colisión entre dous vehículos. O sinistro tivo lugar na estrada N-540, a un quilómetro de Guntín, en sentido Lugo. O 112 Galicia, tras recibir a alerta dun particular ao fío das 18:50 horas de onte, requiriu a presenza de Urxencias Médicas, GES de Monterroso, Tráfico e o servizo de limpeza da vía.