O condutor dun vehículo faleceu esta mañá tras saírse da vía e precipitarse por un terraplén -duns 15 metros- cando circulaba pola A-52, á altura do concello pontevedrés de A Cañiza, en sentido Vigo, no punto quilométrico 273. Ademais, os outros tres ocupantes do vehículo resultaron feridos de diversa consideración e foron trasladados a un centro hospitalario.

O persoal de Urxencias Médicas, tras ser alertado polo 112 Galicia, mobilizou o helicóptero medicalizado con base en Ourense que tomou terra no mesmo lugar do accidente. Tamén se requiriu a presenza dos Bombeiros de Ponteareas, xa que o vehículo quedara nunha zona de difícil acceso cuberta de matorrais e era necesario desbrozar para acceder aos feridos. Un dos implicados no accidente chamou ao 112 Galicia e indicou que, dado que o coche envorcara, tiñan dificultades para saír polos seus propios medios, polo que foron excarcerados todos os ocupantes do coche. Os xestores do CAE 112 Galicia puxeron en marcha un operativo no que interviñeron efectivos do GES de Ribadavia e axentes da Garda Civil de Tráfico, ademais de persoal sanitario e efectivos do parque comarcal. O suceso tivo lugar minutos antes das 11:00 horas de hoxe.