O Boletín Oficial da Provincia (BOPPO) ven de publicar o anuncio polo que se lle conceden 16.634€ a 4 asociacións e colectivos de Tomiño e Nigrán para posta en marcha e promoción de diferentes iniciativas e proxectos de promoción de emprego e de integración social no marco da prestación de servizos sociais de atención especializada.

 Trátase das axudas concedidas polos Servizos Sociais e Promoción de Emprego da Deputación dirixidas a entidades que teñen por obxecto a realización de proxectos ou actividades dentro da provincia orientadas á intervención, asistencia, integración social e laboral, prevención e promoción do benestar daqueles colectivos que, atendendo ás súas especiais circunstancias, precisan dunha maior especificación técnica e interdisciplinar na súa intervención.

Estas axudas  beneficiaron, o pasado mes de maio, a 160 entidades da provincia. As axudas son para a Asociación Asistencial SOS Tomiño, destinadas á compra de alimentos; Asociación de Persoas con Discapacidade  Vontade, para un curso de informática básica; a Asociación Benéfico Social de Pais e Amigos A Esperanza de O Val Miñor, para o Proxecto “Reporteiros en rede 2015” e Asociación de Pais do Centro Castro Navas (Nigrán) para actividades de lecer para persoas con TEA.