Unha persoa que traballaba cun motocultor nunha finca situada no lugar de Deva de Abaixo, na Cañiza, perdeu a vida onte tras sufrir un accidente co vehículo que manexaba. A difícil situación na que quedou o tractor –envorcou ó caer por un desnivel- complicou as tarefas para a recuperación do cadáver. No rescate foron necesarios os recursos humanos e medios materiais dos parques de bombeiros de Ponteareas e Baixo Miño.

Ás 22:15 horas de onte, un particular contactou co 112 Galicia para pedir axuda. Quen alertaba advertía xa que a persoa estaba falecida. De inmediato, o persoal do CAE 112 Galicia solicitou a intervención dos servizos sanitarios de urxencia, que nada puideron facer por salvar a vida do condutor do tractor. Ademais dos Bombeiros de Ponteareas e Baixo Miño, dende o Centro de Atención ás Emerxencias se pediu a colaboración da Garda Civil.