Os Bombeiros de Baixo Miño extinguiron a pasada noite un incendio nunha vivenda dun edificio de catro andares situado na localidade de Baiona. Concretamente, en Baíña, no lugar de O Burgo. Afortunadamente, non houbo que lamentar danos persoais. Ás 21:30 horas da noite de onte, varios alertantes chamaron ao CAE 112 Galicia para pedir axuda. Ademais, moitos de eles, precisaron que se escoitara un forte estoupido e que romperan cristais. Por iso, ante a posibilidade de que houbese persoas afectadas, ademais de alertar aos bombeiros e ás forzas da orde, o 112 Galicia informou a Urxencias Médicas, aínda que, finalmente, non foi precisa a intervención dos técnicos sanitarios. Así e todo, a Policía Local procedeu a desaloxar o edificio por precaución.

Ao redor das 23:30 horas os Bombeiros confirmaron ao persoal do Centro de Atención ás Emerxencias de Galicia que, o incendio, no que -por causas descoñecidas- ardeu un sofá, estaba extinguido. Unha vez ventilado o lugar, os veciños puideron voltar ás súas vivendas. Efectivos do GES de Val Miñor tamén foron parte do operativo posto en marcha polo CAE 112 Galicia.